Jekh berš dive palo so ko Žurnalistengo kher ano Zagfeb sasa prezentirime o lil katar Veljko Kajtazi Katar lafi ki buti, tahj duj berš paloikalipe i avtobiogragija Sune jekhe romeske, ko Romano edukacijako -kulturako centro ano Zagreb 25.oktombro 2023. Prezentirime si ki anglikani čhib telo alav Dreams of a Romani.
Baši pi dživdipaski paramis o auktori šurarkerela la golesa so si bijando ki romani mahala ani Kosovko Mitrovica ko šovardešta berša katar nakhlo šelberšipe.Po čhavoripe deskr iptiril le ki romani mahala, a pal gova dživdipe maškar butipaski kedin kana leski familija avili te dživdisarel ko dizjako maškar. Mukindoj po familijarnikano kher panda katar 13 berš gelo ki Asekerengi sikljovni ano Rajlovac ki Bosna thaj Hercegovina kaj so arakhla pe neve bukjencar, barilo, lija neve džanlipa thaj palo sikljovnako agorkeripe avilo ano Zagreb ko poro avgo bukjarno than ko Aerporto Pleso.
Katar po čhavoripe thaj naodoningate sakova tromalo vakti istemalkerela sa le baši karate sporti, savo so anda leske o avgo medalje thaj angigaripa thaj golesa gelo ko učo nacionalnikano thaj sumnalesko karate sporti, a pal gova dija ko trenerenge paja so ko vakti katar biš berša sode so sasa bi bukjako, trujal leski edukacija, parvarda le. I diskriminacija thaj o predrasude save so džana sa pal leste sahno dživdipe dije le takati pe evidentencar te sikavel sa o zijanipe so keren gasave gndipa thaj vjavaharija keren ko poedinci thaj ki kedin. Činada pe egzamplosa te kerel buti ko cidipe sa o stereotipora save so kerdon upral na sahne stavora thaj kulturako thaj tradicijako na pendžaripe leske džijaneske thaj aktivirisajlo ki politikaki umal te šaj te ,kerel diso pe romane kedinake.
Trujal gova so ko lil o auktori majangle vakjarel baši čhipote thaj bukja katar lesko dživdipe, sar so nimukena sa le te kerel po sahno potenciali sebepi gova sahno dživdipe sasa zaruri te ovel majšukar katar avera na-roma, del deskripcija pe dživdipaskegijate so sakoja Romani ja Romano te šaj te pendžarel pe. Ko sa kava džipherdo del zori so kava lil iklilo thaj ki anglikani čhib thaj sasa prezentirimo anglal diplomatikano kori ani Republika Kroacija, minoritetengi kedin thaj dostora e eRomenge Kedipaske ani Republika Kroacija “KALI SARA” sar kale čhipotakoro organizatori thaj golesa mangla te kerel džipheripe ko globalnikano dijalogo ko džanle teme thaj golesa te keren pe ideengo thajekspiriesengo trampipe.
Gijate ikalindoj kava lil ki anglikani čhip o auktori mangla te del šajdipe e internacionalnikane publikake te del ko romano liljarutnipasko sumnal savo so ko saastarutno romano kulturako butikeripe lena than thaj tamirisaren phurta maškar culture, promovirindoj haljovipe turli perspektive thaj tradicija.
