E Alma Kajtazi arakhla i korkoriizolacija sar savoren, lake givesa sasa ko sahnipe pherde, najsa la vakti te dosadil pe.
I korkoriizolacija nikerda mange nisavo iranipe ko mngro dzuvdipe, čak sasa man majbut bukji nego anglal avralničalo hali. Sahno give sema anglal o laptopo thaj hramosarava sa tekstora baš Romani asvin thaj baš vijek biradzaki organizacija kaj so volontirisarav.
Trujali bukji ni muklja o sikljovipe so si lake jek katar majdzanle segmentora ano give. Te crdel I monotonija katar korkoriizolacija dikhela sa turli humuristikane vedea ano Instagram, numa falila sa lake o vakti avral katar o kher pe amalencar tjak o vakti so nakhel ki natura.
Falila sa mange o khamalo give so šaja se istemalkerav le ani natura, sasa anglonilaj, šundona sa o čirikle, falila sa mange e manušengi galama, majphareste sasa mange o mudripe.
I Anita Kajtazi si studentka ko tamiribasko-arhitektonsko fakulteto trito berš, trujal studentikane dajatve thaj o volonternikano butikeripe ano kedipe arakhla thaj tromalo vakti te dikhel e blogeren thaj e manušen save so phiren sahno sumanl thaj sikljon turli čhiba. O vakti so nakhela sine e dostoncar dzipherda len e videoakharibasa
Istemalkerdam o videoakharina thaj ko gova čhani dzipherdam gova so promuklam kana dzasa ko kafičija thaj kafava pija ‘online’.
Trujal gova so ko vakti katari korkoriizolacija kerela sa pe sakogivese dajatve, falila sa lake laki sakogivesi rutina thaj o kolege katar o fakulteti.
Anglal o avrijal ničalo vakti mo vakti nakhavava sa ano studentengo kher thaj ano fakulteto. Mo fakulteto rodel sako give te ova odoringate, a ano studentengo kher o vakti istemalkerava sa te čitrakerav thaj te sikljovav.
Katar aspekti korkoriizolacija majbut sasa lake lače so dija la šajdipe te ovel majbut vakti pe familijasa.
