I familija katar Pamela Palko katar gav Torjanci ani Osječko-baranjsko županija sasa la jek nevo ekspiriensi i siklana katar duripe.
O duj sikle save so dzan ani sikljovni, sebepi i korkoriizolacija ni dzana sa ani sikljovni, numa khere sasa len but aktivitetora. Trujal gova so kerena sa e sikljovnake dajatve thaj savalija, čutem len te keren bukji katar užarkeripe dzi ki bukji ani keravin, gijate me duj čhave sasa len importantno bukji. Numa falila sa lenge o amala katar sikljovni thaj lenge sikamne, pakjana sa kaj dz ko agor katar so siklanako berš ka irin pe ko pumare kupe.
Pala lende si o masekora katar siklana ko duripe, sar but jerie čhavencar kerde takatora te adaptirinen pe ki gasavi situacija majšukar so dzanen. Ko diso sama kamjabale, ko diso pocra kamjabale, numa dikhlam te arakha o majšukar metodora ko sa so kerasa bukji, phenel i Palko, prezidentka ki romani kedin Sara savi so ko agor katar Maj trubujasa te nišankerel trin berša butikeripe.
Ande ki familija organizirisarde vakti sikljovnake, savo so nakhena sa le anglal TV, ko mobilna telefonora ja ko hramovipe kherutne savalija, numa thaj aktivitetora save so keren pe ko realiteti a na salde ko virtuelnikano sumnal. Trujal sakogivesko sikljovipe thaj khelipe, kaja familija dzala sa ko phiripe ki natura so ki Torjanica si ko butipe.
