Sasa šudri jevendeski rat thaj avral perela sa gusto iv. O bare ivjora čalavena sa ko džami thaj bilana sa , a i avlija sas učardi sa ko parno. I phuri bibi Lea bešela sa korkori ko poro kher ko agor katar o gav, odoringate kaj khoni ni bešela sa. Najsa la khoni, ni falilija, ni amala. Jekh rat, sar o avera, korkori kerda peske akšamluko, palo kodžanel savo drom , bešlja ki mesali. Katar baro mazunipe ni hošisarela sa bokh, a jekhe dromestar šunda disavo sesi. Ačili te ašunel. Sasa gova admija ki avlija.
Ko šaj te ovel akana? gndisarda. Ko j šaj te avel mande?
Katar gova so sasa korkori ni hošisarda dar katar bipendžarutno, numa lošala sa so dajekh avilo late ki avlija thaj te čalavel lake ko vudar. Uštili katar i mesali prastajli ko vudar thaj phutarda le. Anglal late ko iv ačilo jek baro rikono. Sasa le baro balalo šoro, lače kale jakha, sar te mangela sa te vakjarel. Korkori sem, mukle man. I Bibi Lea da jekh dakiko dikhela sa le, gola fafora šajsa te šunel katar lesko dikhipe. O šudripe dela sa andre katar o phutardo vudar pa Lea bangili dži ko rikono thaj phenda leske: Šukar avilan. Ka ova amenge amala.
Ka ha akšamluko barabar. Ka kera amenge amalipe. Ka ha mangro barabar thaj o hape ka ovol majlače.
Sigende čuta e rikone andre, kosla le havlijasa (ručnik ) thaj pakjarda le ki jekh kheba soske sasa leske but šudro, a napal barabar hale pese akšamluko. Pal gova akharda le te avel te bešel dži late ki purani bari bešljarin thaj gijate čale zasute pese. Katar goja rat, i phuri rajoni thaj o balalo rikono nikana niulade pe. Jekhjekheske sasa amal thaj lengo korkorutnipe našaldilo.
Sar si lače te ovel tut amal, gndinena sa o solduj.
