Elementora katar romani tradicija ki kombinacija modernikane dizajnosa thaj tekstili si nišani e modake markake Romani Design. Pumare kolekcije sikavena sa ko jek kotor katar sumnal ki Diveski moda katar Marie Claire ano Pariz, ki modaki revija ko New Delhi ki organizacija katar Republika Ungarijaki ambasada ki Indija ani palata Tadz Mahal ko Mumbai ki Indija, ko kurkeski moda ki Viena Austrija thaj ko javera kulturake manifestacije. Ko gasavo čhani po specifikano kulturako sikavipe promovirisarde I romani kultura sar kotor katar Ungarijako kulturako barvalipe.
E modako studio Romani Design fundirimo so ko 2009 berš , manginasa te del pe arka te peraven pe o stereotipora thaj predrasude mujal o Roma, te pendzardol I publika e romane kedinake darhencar prekal modernikano sikavipe romano folklori thaj te putarel šajdipe te den ani bukji romanja thaj te aktivirin pe o terne. Golese keren pe edukacijake programe thaj workshopora.
“Amari misija si te lel pe than ko sa aspektora ko sasuitnipe, resarinasa te ciknjarel pe o predrasude upri o Roma. Lokeste si te sikavel pe čalipe katar romani moda, but hari halile I romani kultura savi sala late. Amari resarin si te nakjel pe o jazo maškar uravibaskoro materijali thaj e romene kulturako haljovibe mujal I moda“, phenda I Erika Varga, savo so barabar pe phejasa Helena Varga kerda o brendo.
Anglal te keren o brendo, o pheja beršencar sikavena sa e čhaven thaj e ternen baš romano arti. Lengi familija arakhenasa e uravipaski tradicija sar čhani te sikavel pe o plesutno identiteto thaj ko jek kerena sine thaj juveliri. Mangena sine te arakhen čhani o Roma korkori te keren lafi pumenge ko publicirime medijumija mujal kataro stereotipno čhani katar čorolipe, kriminali baš so bi kerena sa lafi o na Roma.
“I moda si mange gova so o lafora si e hramareske ja o renki sos si e tasvirdzijase. O uravipe savo so dizajnirisarav sikavava mo identiteto thaj kerava jek mngro sumnal savo so mangav le ko dzivdipe”, vakjarel I Erika Varga baš pi buki. E fstaja thaj javera asesorija si dzipheripe save so dizajnirisarel I Helena.
“E modake asesorija ko jekautentikano čhani sikavena e romane tradicijake oblikora. Mangav te kombinirisarav turli materijalora mortik thaj tekstili. Mangav kašmir thaj vezime svila lole lulugjencar dzivde renkencar”, vakerela I Helena Vaga baš pi dizajneski buki.
I nevi kolekcija anglonilaj –nilaj 2019 anela stilizirime romano anglikano buntovno ruhi. O dizajnerke lungo vakti mangena sa te den sajdipe e dzuvljenge ikonenge ki pumari familija thaj te čiven lenge portretora ko čeja thaj ko modake detaljora. I resarin si te sikavel pe e Romanjengo takati thaj te bičalen mesažo kaj o romanja trujal o stereotipija šaj dena dzovapi ko sa nevo. Sar pozitivnikane egzamplora e Erikaki thaj I Helenaki dej sasa kamjabali bukjarni romni . Katar tradicijake romane basme I Helena kerda egzamplo savo so si sar khangerijako vitraži savo so sikavela pakjaibe a pal gova digitalne printereja čute o portretora pe dake thaj pe mamijake ko tekstili. Golestar kerde kolekcija dromali moda neve vakteske forme inspiririme katar Frida Kalo.
Kaja meksikani tasvirdzika sar dzuvli si inspiracijako hainge dizanerkenge katar Romani Designa. Aso romani filozofija sakoja dzuvli pesa phiravela garavdo lačipe, a o uravipe si jek katar o čhanija kolesa so voj šaj te sikavel po rošalipe thaj principora.
But pendzarde manuša ulavdo ani Ungarija, sar so si I giljavutni Gabi Tóth, I akterka Eszter Ónodi i Gabrielle Hámori ja I giljavutni Gergőra Oláha arakhle pumaro uravibasko stili ko modako saloni Romani Design. Ko gova čhani modasa buvljarel pe I minsa baš barvalo kulturako tradicijako phiravipe savo so o Romani Design ko jek kreativnikano čhani kerde le ko nevev vekteski modaki scena.
