Grattan Puxon e Britanijako marutno baši romenge nijamora ki profesija si žurnalisto.Kana nimangla te ovel regrutirimo ki leski bijandi Anglija našlo ki Irska kaj so arakhla pe e Irskake Dromarutnencar thaj gelo lencar te dživdisarel nomadikano dživdipasko čhani. Ki Anglija irisajlo 1966. thaj o jekhajekh berš sasa jekh katar o fundavutne ko Romano konsilij ko Kent kaj so sasa avgo sekretari. Telo Puksonesko legaripe kerda pe kampanja baši pasivnikani rezistencija mujal čhelalipe e romane karavanenge katar publicirime parcele, so kerda baro interes ko medie. E kampanjasa si kerdo asari te anel pe Lačarin bašo karavanengo lociripe (1968) kolasa so o komune sasa len dajatva te del lokacie e karavanenge. O Pukson sahni peri kariera kerda la ko maripe mujal dislokacie e romane mahalenge, dela sa arka sa okolenge save so sasa astarde kale problemencar. Trujal gova dela sa arka thaj savorenge katari romani khedin save so rodena sa azili.
O Pukson si inkludirime ko internacionalnikane muvmentora save so džipheren e romane džijaneske nijamora. Lija than ki organizacija e avgo Romane kongreseske ano London 1971. Dikhindoj kaj sa džitogajutno politikano thaj sasuitnipasko Romengoro hali savo so šelberšipasa definirisarela sa pe avral katari romani khedin, kaja čhipota sasa diso nevo ki romengi historija thaj lengo maripe baši plesutno identiteto, sasuitnikano, ekonomikano thaj kulturnikano bajroipe. O partisipantora ko Kongresi, pumari buti organizirisarde la ko panč komisie baši edukacija, socijalnikane pučipa, marebake čhelalipa, kultura thaj čhib. O Pukson dija arka ki komisija baši marebake čhelalipa thaj e partisipantoren informirisarda baši buti e ckne studijake kupake kaj so trujal leste sasa o Faik Abdi thaj o Donald Kenrih savi so ko alav taro Maškardžijanesko Romengo komiteto trin berš pučarkerena sa o nacistikane čhelalipa kerde e romane džijaneske. Ko kava kongreso o Pukson sasa alusardo baši generalnikano sekretari ki Internacionalnikani romani unija. Palo Trito Romano Sumnalesko Kongreso ani Germanija 1981. ko lesko than sasa alusardo o Rajko Džurič.
O Pukson si bijando ani Anglija, dživdisarela sa ani Grčka, Makedonija, Srbija thaj UAR. Ani Grčka ko 1970-ta editirilasa o avgo mašjkardžijanesko magazini ki romani čhib Loli phabaj . Bute pamfletencar thaj artikloncar, hramosarda nekobor lila baši historija thaj ekspiriensi e romen džijaneske sar so si On The Road (1967), Rom: Europe’s Gypsies (1973) thaj o romani Free Born Traveller (2007). Sar koauktori e pendžarde britanijake romologosa Donald Kenrih hramosarde i avgo saastardi studija baši Romengo genocid The Destiny of Europe’s Gypsies (1972) savi so si ikaldi pobut droma thaj gova ko ohto čhibja, inkludirindoj thaj romane. Lesko sahno dživdipe nišankerel i mareba baši Romenge nijamora thaj e dromarutnenge thaj gijate lija than ko arakhipe e romane delegacijake e dženencar katar Odbori ko Evropako Konsilij savo so pedžakerela sa pe e Romengere halesa thaj e Dromarutnen ani EU. Ko kava vakti kerel buti sar organizatori ko Ustiben, organizacija savi so si kreirime te šaj te koordinirisaren pe o politikane aktivitetora e britanijake Romenge.
