Dario Bogdan si terno manuš savo so kerel buki ko Romengo Khedipe ani Republika Kroacija “KALI SARA”, phenda kaj bare dzanlipastar si te ikerel pe o barabarutnipe ko phare vaktora thaj phenda kaj o vakti so nakhlam ki korkoriizolacija šajsa de del amen arka te da amen godzi so si gova te ovel pe manuš thaj savi si leski manušikani mol.
Jek gasavo vakti šaj te ovel amenge diso so ka čuvel amen go gndipe, akharipe te da amen godzi ko fundavne manušikane nijamora sode lokeste šaj te pagjova thaj sode si dzanlipastar te ikjera amen barabar thaj te da arka jek jekheske.
Telo barabarutnipe, haljolpe jekhipe sa e manušengo, bi te dikhel pe ko nacionalnikano, rasako ja pakjaipasko preperipe.
O vakti savo so avel ka del baro rodipe ko sahno sumnal, aven ekonomikane, socijalnikane thaj sastipaske krize, thaj palem liparav zaruri sit e ikjara amen barabar. Ni vakjerav te ulava amen ko kedina, salde Roma te ikjaren pe barabar ja aver kedin, numa savore amen sar manuša.
Šaj i korkoriizolacija nekaske dija arka korkoro pes te pindzarel thaj te dzanel so mangel ano dzuvdipe.
Gndisarav kaj jek gasavi situacija ko agor šaj te anel amen ko čačutno drom, te sikavel amenge disave majbare resarina thaj te del amen gova so trubul amen –iranipe! Pakjav kaj siklilam te kera šukrikeripe e bukjenge so lasalen gijate sar so dikha len thaj pakjav kaj ka ovel amen majlačo iranipe.
