Boho šik thaj Romengo šikaniribe

0
11
Foto: vecteezy.com

Boho  (bohemian, boemski) stili ki moda dušel berša sikavel tromalo ruhi, stili savo so naj le stroga norme thaj si avri katar konvencije. Phandlo si terne manušencar save so prekal zamanora, dikhena sa te keren jek distanca katar dominantnikane materijalistikani kultura.

Anglodikhen lačo, renkalijo, lokho, nabut pherdo. Boho kerdilo sar “egzotikani alternativa”(modako) status quo pherdidzivdipaski kontrakultura phandli umetnikoncar, hramarencar, intelektualcija, kreativna thaj nakonvencionalnikane manuša.

Ki konstrukcija thaj percepcija boemesko stili, si ulavdi doza jekajek ruhi, ko tradicionalnikano, ko sasuitnipasko seksualno represija thaj tromalo alusaribe, mujal  imperativi katar materijalnikano thaj sigutno, numa aso avera norme, gasavo stili majbut phandel pe sar negativno egzamplo, ckni higiena thaj turli oblikora “primitivizmo”.

O lafi boemizmo iklilo ani Francija ko šuru katar 19 zamani kana o artistora lije te kiden pe ko ulavde, čorole, primarno  romane kvartora. Ačavde bi  barvale mecene, baro numero artistora dzivdisarena sa ano čoripe, najsa len khanci, sar nomadora. Phiravena sa purane šeja, hana sa cra thaj nipijena sa. Gijate resle dzi sakogivesko dzuvdipe, ko agor katar sasuitnipe.

Bohémien sasa alav e romane kedinake ani Francija,  savenge so bangeste pakjalasa pe kaj resle ani Francija ko 15 zamani prekal Bohemija (dakšinalo kotor katari modernikani Češka). „Boemi“ majgeči ovol  inspiracija baš boemesko stili, sar ki moda, gijate buvleste ani kultura. Gova sasa Roma thaj Romanja save so dzuvdisarena sa ani Francija, interesnikane nomadora pherde dzivdipaski historija thaj kultura javere dikhipasa ko dzuvdipe thaj dikhipe ko arti thaj modako pučarkeripe.

Majgeči o termini „boemsko“ istemalkerela sa pe artistenge, manuša save so sasa len nakonvencionalnikano dzivdipe, kreativna thaj naničalo dzivdipe. Ko maškar katar 19 zamani e francijake artistora boemija thaj romantičara, istarde o orientalnikano uravipasko čhani, renkalie basme, udzuzi juveliri, turli šešira, lungo bal- dikipe so sine karakteristikano e romane kedinake.

O hramari Henri Murger ko gova vakti hramosarda Dikhipe ko boemesko dzuvdipe, e artistenge thaj e intelektualconge ko purane kaputora thaj pharavde menie ko čorolo parizesko kvarti savo so sasa inspiracija o Pučini te kerel i pendzardi opera La Boheme.

Foto: wikimedia

Ko agor katar 19 thaj šuru 20 zamani o aspektora katar boemengi moda ikerena sa specifikano dzivdipasko čhani, sasa „kodi“ te drabarel pe karakteri thaj dzivdipaske bukja. Kana o boho sik sar modako stili pobuvleste dzivdisalilo ko Evropake droma, Sunday Times, notisarda kaj “modernikane čhaja phiravena suknje lulugencar, pakjaipasa kaj ka dikjon sar boemora, nomadora  thaj naburžujsko”, dzikote “o romane čhaja  si seksi thaj lače sose naj len gajlja e modake“.

Majgeči o mas medije thaj buhleste i modaki industrija astarda o boho stili, a i kontra kultura sa gova upiila sa ko sa umala, phareste si late te arekhel pe alternativnikano potencijali. Kana e modake magazinora sikaven kuč dizajnereske šeja boemeske stilosa, kolate so ruhjale ka čučon e barvale manuša, e bukja dikjon čučarde.

Interesnikano si te dikhel pe sar bajrola o boho stili thaj filozofija  te dikhel pe paralelnikane e modako thaj buhleste kulturako astaripe gole sikavipaske, e Romengi pozicija ko sasuitnipe stagnirisarda thaj but drom degradirime. Katar “boemesko boom” e Roma ni lije khanči ni resarde ekonomikano prosperiteti, nikerda pe valorizacija katar kreacija thaj origanalnost savi so avili katar Roma.

O Roma sasa inspiracija bute artistenge i magija lendar dikhela sa pe duraldan, a ki Francija nikana ni avilo dzi kova o Roma te oven astarde. Boho ulo šik, a o Roma šikanirime.

Komentiraj

Unesite svoj komentar
Unesite svoje ime